2025 жылдың 1 маусымында Көкшетау қаласында Балаларды қорғау күніне орай Қазақстан тарихында бұрын-соңды болмаған ерекше оқиға өтті — еліміздегі ең үлкен балмұздақ дайындалып, ұлттық рекорд орнатылды. Іс-шара қала тұрғындары мен қонақтары үшін жаңа серуен набережнаясының ашылуымен тұспа-тұс келіп, Көпе көлінің жағасында, ашық аспан мен шуақты күннің аясында өткен жарқын мерекеге айналды. Табиғаттың өзі де бұл күнді қолдап тұрғандай — ауа райы тамаша болды, ал жаздың алғашқы күні шын мәнінде ерекше есте қалды.

Ұлттық рекордтық балмұздақтың көлемі де таңғалдырмай қоймады: әрқайсысы 170 келіден тұратын 10 үлкен контейнер — барлығы 1 700 килограмм балмұздақ дайындалды. Төрт сағат ішінде 10 000-нан астам адам балмұздақ алып, тәтті мерекенің бір бөлігіне айналды.

Балмұздақты таратуға Қазақстандағы жалғыз ТЖМ жоғары оқу орны — М.Габдуллин атындағы Азаматтық қорғау академиясының 40 курсанты мен Құрылыс-техникалық колледжінің 20 студенті белсенді атсалысты. Олардың жауапкершілігі, шапшаңдығы және халыққа деген ықыласы шараның жоғары деңгейде өтуіне үлкен үлес қосты. Кештің сәнін көркем әндерімен танымал әнші Садрадин келтірді — оның өнері көрермендерге ерекше көңіл-күй сыйлады.

Әрине, мұндай ауқымды жобаларда тосын жағдайлар да болмай тұрмайды. Таңғы сағат 7:00-де балмұздақ тиелген фура набережнаяға келіп тұрғанымен, сағат 10:00 шамасында оның тоңазытқыш құрылғысы істен шыққаны анықталды. Ұйымдастырушылар жедел шешім қабылдап, фураны зауытқа қайта жөнелтті. Сол жерде балмұздақ мұздатқыш камераға орналастырылып, қосымша мұздатудан кейін екі тоңазытқыш көлікке қайта тиеліп, іс-шара орнына жеткізілді. Осындай күтпеген қиындықтарға қарамастан, балмұздақ сапалы күйінде — суық, дәмді және мінсіз күйінде қала тұрғындарына таратылды.

Біз бұл жобаның жүзеге асуына үлес қосқан барлық әріптестерімізге шын жүректен алғыс айтамыз. Шикізат жеткізушілерінен бастап логистикалық қызметке, өндірістегі жұмысшылардан бастап, күннің ыстығына қарамастан мыңдаған адамға балмұздақ үлестірген әріптестерімізге дейін — бәріңізге шынайы ризашылығымызды білдіреміз. Сіздердің қажырлы еңбектеріңіздің арқасында бұл күн ерекше әсерлі, шынайы қуаныш пен мақтаныш сезіміне толы болды.

Бұл күн — бірлік пен мейірімнің, ортақ іске деген сенімнің символына айналды. Ол тек ұлттық рекордпен ғана емес, сонымен қатар Көпе көлінің жағасындағы жаңа набережнаяның ашылуымен, көктеммен қоштасып, жазды шаттықпен қарсы алумен есте қалды.